သြကာသ ဘုရားရှိခိုးတဲ့အခါတိုင်း " ဤကဲ့သို့ ရှိခိုးရသော ကောင်းမှုကံ စေတနာကြောင့် ဗျသနတရားငါးပါးမှ အခါခပ်သိမ်း ကင်းလွတ်ငြိမ်းသည် ဖြစ်၍ ဆိုပြီး ပါတယ်နော်။
ဗျသနတရားငါးပါးဆိုတာ . .
ဉာတိဗျသန = ဆွေမျိုးမိတ်ဆွေ ပျက်စီးခြင်း။
ဘောဂဗျသန = စည်းစိမ်ဥစ္စာ ပျက်စီးခြင်း။
ရောဂဗျသန = အရာရောဂါ နှိပ်စက်ခြင်း။
သီလဗျသန = သီလ ပျက်စီးခြင်း။
ဒိဋ္ဌိဗျသန = အယူပျက်စီးခြင်း , အယူမှားခြင်း။
တို့ပဲ ဖြစ်တယ်။ ဒီဗျသနတရားငါးပါးအနက် ရှေ့က ဗျသနတရား သုံးပါးကြောင့် ကျတဲ့ မျက်ရည်တွေဟာ သမုဒ္ဒရာလေးစင်းမက များခဲ့ပါပြီ။
ဒါဆို . . သီလဗျသန နဲ့ ဒိဋ္ဌိဗျသနာ ကြောင့် ကျတဲ့မျက်ရည်ဟာ . . . တန်ဖိုးရှိတဲ့ မျက်ရည်လား ? တန်ဖိုးမရှိတဲ့ မျက်ရည်လား ?
သီလဗျသန . . သီလ ပျက်စီးခြင်း။
မိမိက သီလ မလုံခြုံဘူး။ သီလ ပျက်စီးနေတယ်။ အဲဒီသီလ ပျက်စီးနေတဲ့ အဖြစ်ကို မိမိက မကျေနပ်ဘူး။ သီလ ဖြူစင်ချင်တယ်။ သီလပြည့်စုံချင်ပါလျှက်နဲ့ အကြောင်းအမျိုးမျိုးကြောင့် သီလမပြည့်စုံရလို့ ဆိုပြီး မျက်ရည်ကျတယ်။
အဲဒီမျက်ရည်ဟာ တန်ဖိုးရှိတဲ့ မျက်ရည်ပါပဲ။ အဲဒီမျက်ရည်ကို အခြေခံပြီး သီလ ဖြူစင်အောင် ကျင့်ကြံအားထုတ်နိုင်တယ်။
ဒိဋ္ဌိဗျသန . . အယူမှားတာ။ မိစ္ဆာဒိဋ္ဌိ အယူမှား ဖြစ်နေတယ်။ မိမိက အယူမှန် ဖြစ်ချင်တယ်။ အယူမှား ဖြစ်နေတာကို ဝမ်းနည်းပြီး ကျတဲ့မျက်ရည်ဟာ တန်ဖိုးရှိတဲ့ မျက်ရည်ပါပဲ။
မြတ်စွာဘုရား လက်ထက်တော်တုန်းက တာလပုဋ ခေါ်တဲ့ ဇာတ်ဆရာကြီးတစ်ယောက် ရှိတယ်။
တစ်နေ့ မြတ်စွာဘုရားထံ ချဉ်းကပ်ပြီး လျှောက်တယ်။
" မြတ်စွာဘုရား . . တပည့်တော်တို့ ကချေသည်တွေ သေဆုံးရင် ပဟာသနတ်ပြည် ရောက်တယ်လို့ ဆရာ အစဉ်အဆက်က ပြောကြတယ် , အဲဒီစကား မှန်ပါသလား ? လို့ မေးတော့ . .
ဘုရားရှင်က နှစ်ကြိမ်တိုင်တိုင် တားမြစ်ပေမယ့် သုံးကြိမ်မြောက်မှာတော့ မြတ်စွာဘုရားရှင်က . .
"ကချေသည်တွေ သေဆုံးလို့ရှိရင် ပဟာသနတ်ပြည် ရောက်တယ် ဆိုတဲ့ အယူအဆဟာ မှားယွင်းတဲ့ အယူအဆ ဖြစ်တယ်။
အဲဒီ မှားယွင်းတဲ့ အယူအဆ မိစ္ဆာဒိဋ္ဌိနဲ့သာ သေရင် ငရဲ , တိရစ္ဆာန် ဂတိ၂ပါးထဲက တစ်ပါးပါးကို လားရောက်ရပါလိမ့်မယ်။
အဲလို ပြောလိုက်တော့ ဇာတ်ဆရာကြီးက ချုံးပွဲချပြီး ငိုတယ်။
ဘုရားရှင်က . . ငရဲကျမှာ ကြောက်လို့ , တိရစ္ဆာန် ဖြစ်မှာ ကြောက်လို့ ငိုတာလား ? မေးတော့ . .
" မဟုတ်ပါဘူး တဲ့။ ဆရာအစဉ်အဆက်က ကချေသည်သေရင် နတ်ပြည်ရောက်မယ်လို့ ပြောတဲ့စကားကို အမှန်လို့ ယူဆပြီး အယူမှားခဲ့တဲ့အတွက် ဝမ်းနည်းလွန်းလို့ ငိုတာပါဘုရား . . လို့ ပြန်လျှောက်တယ်။
အယူမှားခြင်း တနည်း ဒိဋ္ဌိဗျသန ဆိုတာ မိစ္ဆာဒိဋ္ဌိ ပါပဲ။ ဇတ်ဆရာကြီးက မိမိအယူမှားနေတာကို သိလို့ ချုံးပွဲချငို မျက်ရည်ကျတယ်။
မျက်ရည်ကျပြီးတော့ . . အဲဒီအယူမှားတွေကို စွန့်ပြီး သာသနာ့ဘောင်ကို ဝင်ရောက်လို့ ရဟန်းပြုတယ်။ ရဟန်းပြုပြီးတော့ ဝိပဿနာ အားထုတ်လိုက်တာ ရဟန္တာ ဖြစ်သွားတော့တယ်။
ဇာတ်ဆရာကြီးဟာ ဒိဋ္ဌိဗျသန = အယူမှားခြင်းကို အကြောင်းပြုပြီးတော့ ကျခဲ့တဲ့ မျက်ရည်ဟာ တန်ဖိုး မရှိဘူးလား ? ရှိတယ်နော်။
ရဟန္တာဖြစ်တဲ့အထိတောင် တန်ဖိုးရှိသွားတယ်။
ဒါကြောင့် . .
ရဟန်းဝတ်ခြင်း , သီလရှင်ဝတ်ခြင်းကြောင့် ကျတဲ့မျက်ရည်။
ဝိပဿနာအားထုတ်မှုနဲ့ ပတ်သက်ပြီး ကျတဲ့မျက်ရည်။
ဂုဏ်တော်ပွားများခြင်းနဲ့ ပတ်သက်ပြီး ကျတဲ့မျက်ရည်။
ဈာန်တရား , မဂ်ဖိုလ်တရားတွေ ရချင်လို့ ကျတဲ့မျက်ရည်။
သီလဗျသန , ဒိဋ္ဌိဗျသနကြောင့် ကျရတဲ့ မျက်ရည်တွေဟာ တန်ဖိုးရှိတဲ့ မျက်ရည်တွေပါပဲ။
မိမိကျလိုက်တဲ့ မျက်ရည်ကြောင့် . . .
အကုသိုလ်တရားတွေ ဆုတ်ယုတ်သွားတယ်။
ကုသိုလ်တရားတွေ တိုးပွားလာတယ် ဆိုရင် အဲဒီမျက်ရည်မျိုးဟာ ကျထိုက်တဲ့ မျက်ရည်။ တန်ဖိုးရှိတဲ့ မျက်ရည်ပါပဲနော်. . .။
" ဆရာတော် အရှင်ဆန္ဒာဓိက - ရွှေပါရမီတောရ "
-----------------------------------------------------------------------------
https://www.facebook.com/muditaralinnsayadwdhamachannallive/
တွင်လည်းဖတ်ရှူ နိုင်ပါသည် ။
---------------------------------------------------------------------------
posted from Bloggeroid
No comments:
Post a Comment