ဓမ္မမိတ်ဆွေတို့ အတွက် ရှင်းလင်းဖေါ်ပြခဲ့တဲ့ ပဋိစ္စသမုပ္ပဒ် ရှင်းတမ်း ဆိုတဲ့ အရင် စာစုမှာ အဓိက လိုရင်းကိုသာ ဖေါ်ပြရေးသားခဲ့ရတဲ့အတွက်ကြောင့် တချို့ နေရာနေတွေမှာ ပဋိစ္စသမုပ္ပဒ် ရဲ့ အင်္ဂါရပ်တွေ ကို တိတိကျကျ မရေးသားဘဲ သဘောလောက်သာတင်ပြခဲ့တာရှိခဲ့ပါတယ်။
ပဋိစ္စသမုပ္ပဒ် ဒေသနာတော်ဟာ ခက်ခဲနက်နဲလှတဲ့အတွက် တစ်စုတစ်စည်းထဲ တင်ပြဖို့ အတွက် ဒီဖေ့စဘုတ် အင်တာနက်စာမျက်နှာမှာ အခက်ခဲဖြစ်စေပါတယ်။
ဒါကြောင့် ဖေါ်ပြဖို့  ကျန်ရှိခဲ့တဲ့ " ဝဋ် " အကြောင်းကို မိုးကုတ် ဆရာတော်ဘုရားကြီး ရဲ့ သစ္စာအနက် ၁၆-ချက် တရားတော်တွေထဲ က ကောက်နှုတ်ပြီး ဖေါ်ပြကုသိုလ်ပြုလိုက်ပါတယ်။
" ဝဋ် " နဲ့ ပတ်သက်ပြီး ဓမ္မမိတ်ဆွေ တို့  ပြောလေ့ရှိတာက၊ သိထားလေ့ရှိတာက...
ဝဋ်လည်တတ်တယ်၊ ဝဋ်လည်လိမ့်မယ် စတဲ့ စကားရပ်ပါဘဲ။ တကယ်တော့ ပဋိစ္စသမုပ္ပဒ် ကို သိလို့ ဖြစ်စေ၊ မသိလို့ ဘဲ ဖြစ်စေ ပြောကြဆိုကြတာ လည်း ဖြစ်ပါတယ်၊ ဘယ်လိုအသိ နဲ့ဘဲ နားလည်နားလည် "ဝဋ်" ဆိုတာ လည်တတ်တယ် ဆိုတဲ့ သဘောကို သိထားကြတော့..ဝမ်းသာစရာပါ။ ဘာလို့ လဲ ဆိုတော့ "ဝဋ်လည်တယ်" ဆိုတဲ့ တရားကိုက..ပဋိစ္စသမုပ္ပဒ် ဖြစ်နေလို့ ပါဘဲ။
တစ်ခုသတိထားရမှာက.. ဓမ္မမိတ်ဆွေ တို့ ကောင်းတဲ့ကုသိုလ်တွေဘဲပြုပြု၊ မကောင်းတဲ့ အကုသိုလ် တွေကိုဘဲ လုပ်လုပ်၊ အကြောင်းသင့်တဲ့ တချိန်မှာ ဒီ ကုသိုလ်၊အကုသိုလ်တွေ ရဲ့အကျိုးကိုတော့ စံစား၊ ခံစားရမှာ ဖြစ်တဲ့အတွက် ကောင်းတဲ့ဝဋ် စံစားစံစား၊မကောင်းတဲ့ဝဋ် ကို ဘဲ ခံစားခံစား၊ အဲဒီလို အချိန်ခါမျိုးမှာ အကြောင်းကြောင့်မို့ ၊ ခုလို အကျိုးဖြစ်တာ ဆိုတဲ့ အသိကလေး ရှိနေရင် ဓမ္မမိတ်ဆွေ တို့ အဖို့  သံသရာက လွတ်မြောက်ဖို့ လမ်းကြောင်းပေါ်လျှောက်ဖို့ အတွက် လမ်းပေါ်ကို စရောက်နေပါပြီလို့ ဆိုလိုက် ပါရစေ။
တကယ်တော့..ဓမ္မမိတ်ဆွေတို့ အခု လက်ရှိ ပစ္စုပ္ပန်ဘဝ မှာ လူလာဖြစ်နေတာကို က " ဝဋ် " ခံနေရပါလား၊ ဝဋ်ကောင် ကြီးတွေ ဖြစ်နေပါလားဆိုတဲ့ အသိ ကို သိထားဖို့ လိုပါလိမ့်မယ်။
ဒီအသိကို မေ့လျောနေတဲ့အတွက် ဓမ္မမိတ်ဆွေတို့ အခုရောက်ရှိနေတဲ့ " ဝဋ် " နဲ့ ပါတ်သက်ပြီး တင်ပြဖို့ ခုလို နိဒါန်းပျိုးရေးရခြင်းဖြစ်ပါတယ်။
ဓမ္မမိတ်ဆွေတို့ ဟာ ဘယ် ဝဋ်ကာလ ထဲမှာ ရောက်နေသလဲ ဆိုရင်...
ပဋိစ္စသမုပ္ပဒ် မှာ ဝဋ်( ၃ ) ပါးရှိတဲ့အနက်
" ဝိပါကဝဋ် " ထဲ ကို ရောက်ရှိနေတဲ့ ကာလဘဲ ဖြစ်ပါတယ်။
" ဝဋ် " အကြောင်း စပြီးရှင်းပြရရင်..
"ဝဋ္ဋ" ဆိုတဲ့ သဒ္ဒါဟာ စက်ဘီးတွေ ချာချာလည်သလို "လည်ပတ်ခြင်း" ဆိုတဲ့ အနက် ကိုပြောတာပါ။ ဒါ့ကြောင့် "အကြောင်းပြီးလျှင် အကျိုး ၊ အကျိုးပြီးလျှင်အ
ကြောင်း " ဟု အကြောင်းအကျိုး မပြတ်ဘဲ ဆက်ကာဆက်ကာ လည်ပတ်နေတဲ့ "ပဋိစ္စသမုပ္ပါဒ်"တရားကို "ဝဋ္ဋ=ဝဋ်" ဟုခေါ်၏..တဲ့။
ပဋိစ္စသမုပ္ပဒ် ဒေသနာတော်အရ ဝဋ်( ၃ ) ပါးရှိပါတယ်။
( ၁ )ကိလေသဝဋ်
အဝိဇ္ဇာ၊ တဏှာ နှင့် ဥပါဒါန်
( ၂ )ကမ္မဝဋ်
သင်္ခါရ နှင့် ကမ္မဘဝ
( ၃ )
ဝိညာဏ်၊ နာမ်ရုပ်၊ သဠာယတ၊ ဖဿ၊ ဝေဒနာ၊ ဇာတိ ဥပပတ္တိဘဝ၊ ဇရာမရဏ
တို့ဖြစ်ပါတယ်။
"ကိလေသဝဋ်" ရှိလျင် "ကမ္မဝဋ်" မုချ ဖြစ်ပါတယ်။ " ကမ္မဝဋ် "ရှိ လျှင် "ဝိပါကဝဋ် "အမြဲဖြစ်ပါတယ်။ " ဝိပါကဝဋ် " ဝေဒနာ ရှိရင် တဏှာ စသော " ကိလေသဝဋ် " ဖြစ်ပြန်ပါတယ်။အဲဒီလို အကြောင်းအကျိုး ဆက်စပ်လျက် ပတ်ချာ လည်နေသောတရားတို့ကို"ဝဋ်" လို့ ခေါ်ရတာပါ။
လေးပါးသစ္စာရှိတဲ့အနက်...
ဒီ " ဝဋ်( ၃ )ပါး " က ကျွတ်လွတ်ရာဌာနကို နိရောဓသစ္စာ(နိဗ္ဗာန်)လို့ ခေါ်ပါတယ်။
နိရောဓသစ္စာ အနက် ( ၄ ) ချက်ရှိပါတယ်။
၁။ နိဿရဏဌော = ဒုက္ခလက်မှ ထွက်မြောက် လွတ်လပ်ခြင်း သဘော။
၂။ ပဝိဝေကဌော = နှောင့်ယှက်ခြင်းတို့မှ လွတ်ကင်းသော သဘော။
၃။ အသင်္ခတဌော = အဖန်ဖန်ပြုပြင်ခြင်းမှ လွတ်ကင်းခြင်း သဘော။
၎။ အမတဌော = အဖန်ဖန်သေခြင်းမှ လွတ်ကင်းသော သဘော တို့ ဖြစ်ပါတယ်။ ။
ဒုက္ခလက်မှ ထွက်မြောက် လွတ်လပ်ခြင်း သဘော ဖြစ်တဲ့ "နိဿရဏဋ္ဌော" ဆိုတာ "ဝဋ် သုံးပါး " ကျွတ်လွတ်တဲ့ အနက်သဘောပါပဲ။
ဒါ့ကြောင့် ခုနပြောသလို ..
ဒီ " ဝဋ်( ၃ )ပါး " က ကျွတ်လွတ်ရာဌာနကို နိရောဓသစ္စာ(နိဗ္ဗာန်)လို့ ခေါ်ပါတယ်။ ဝဋ် လည်တာသိ မှ ဝဋ်ကျွတ်ချင် မှာ ဖြစ်တဲ့အတွက်ကြောင့် ဝဋ်လည်နေတာ ကို ရှေးဦးစွာဖေါ်ပြပါရစေ။
မိုးကုတ် ဆရာတော်ဘုရားကြီး ဟောတာက..
"အဝိဇ္ဇာ နဲ့ တဏှာ " ကို "ကိလေသဝဋ်" လို့ ခေါ်ပါတယ်။
"ကုသိုလ်ကံ နဲ့ အကုသိုလ်ကံ"ကို တော့ "ကမ္မဝဋ်"လို့ခေါ်ပါတယ်။
" ဝိပါကဝဋ်"ဆိုတာကတော့ "ရုပ်နာမ်ခန္ဓာ"လို့ သာမှတ်ထားလိုက်ပါ..တဲ့။
"ကိလေသဝဋ်" ကြောင့် "ကမ္မဝဋ် " ဖြစ်တယ်။ "ကမ္မဝဋ်" ကြောင့် " ဝိပါကဝဋ်" ဖြစ်တယ်။
(၁) ကိလေသဝဋ်က (၂) ကမ္မ၀ဋ်ဖြစ်။ (၂) ကမ္မဝဋ်က (၃) ဝိပါကဝဋ် ဖြစ်တယ်။
အထက်ကပြောခဲ့သလို ဓမ္မမိတ်ဆွေတို့က "ဝိပါကဝဋ် "ထဲမှာ ရောက်နေပါတယ်။ တဖန် အခုရောက်နေတဲ့ "ဝိပါကဝဋ်"ထဲကနေပြီး "ကိလေသဝဋ်" ကို ပြန်သွားဦးမယ်ဆိုရင် "ကမ္မဝဋ် "လာတော့မှာပါပဲ။
"ကမ္မဝဋ်" ဖြစ်ရင် နောက်ဘဝဆိုတဲ့ " ဝိပါကဝဋ်" ထဲ ရောက်ဦးမှာပါပဲ။
ဒီတော့ သြော် ......
"ဝဋ် "ဆိုတာ ဒီလိုလည်တာကို ဆိုလိုတာ။
ဥပမာ..
မွေးလာလို့ .. ခြေမပါ လက်မပါတာကို ဆိုလိုတာမဟုတ်ပါဘူး။
အခု မိမိတို့ ဟာ " ဝိပါကဝဋ် "ထဲ ရောက်နေပါလားလို့ သိထားရပါမယ်။ ပြန်စဉ်းစားကြည့်ရင် မိမိတို့ ၊ဓမ္မမိတ်ဆွေတို့ လူဖြစ်နေတာဟာ ကံကောင်းလို့ လူဖြစ်နေတာ မဟုတ်ပါဘူး။ ဒါ " ဝဋ် "သင့်နေတာပါ။ အခုနေရတဲ့ ရုပ်နာမ်ခန္ဓာဟာ သစ္စာနဲ့ ဖွဲ့ကြည့်တော့ ဒုက္ခသစ္စာ ပါ ပဲ။ ဒီတော့ ဒုက္ခဝဋ် မကျွတ်သေးဘူး လို့ ဆ်ိုလိုတာပါ။ နောက်က "ကိလေသဝဋ် " "ကမ္မဝဋ်" တို့က ပြုပြင်စီမံလိုက်တဲ့ ဒီရုပ်နာမ်ခန္ဓာကြီးထဲမှာ အို-နာ-သေတွေ ပါနေတယ်။ ပါနေတော့ "ဒုက္ခသစ္စာ"လည်း ဟုတ်တယ်။ အသုဘကောင်ကြီးလည်းဟုတ်တယ်။ ဒီတော့ ဒီ “အို-နာ-သေ ရုပ်နာမ်ခန္ဓာကြီး၊ အသုဘခန္ဓာကြီးကို မိမိတို့ မှာ ဘယ်သွားသွား ထမ်းသွားနေရတော့ ဒါ ဝဋ် ကြီးလိုက်နေတာ။ ဒီ ရုပ်နာမ်ခန္ဓာဝန်ကြီးကို ထမ်းထမ်းသွားနေရတော့ ဝန်ထမ်းသမားသက်သက်ပါပဲ။ ဒီဝန်ကြီးကို မချနိုင်သေးဘူး။ ဒီခန္ဓာကြီးကို အခုလဲ ထမ်းကောင်းတုန်းပဲ။ နောင်လဲ တောင်ဝှေးထောက်ပြီး ထမ်းရဦးမှာပဲ။ နောက် ....လေးဘက်ထောက်သွားပြီးတော့လဲ ထမ်းရဦးမှာပဲ။ ဒီလို အိုတတ် နာတတ် သေတတ်တဲ့ ခန္ဓာကြီးကို သွားလေရာထမ်းသွားနေရာတာဟာ အရိယာမျက်လုံး၊ သမ္မာဒိဋ္ဌိမျက်လုံးနဲ့ကြည့်ရင် "ဝဋ်ကောင်ကြီး" အစစ်ပဲဆိုတာ မြင်ရတာပါပဲ။
"ခွေးနာ လည်ပတ်ကြီး” မြင်မှ “ဝဋ်ခွေးကြီး”လို့ထင်တယ်။ ခြေမပါ၊ လက်မပါ၊ မျက်စိတစ်ဖက်မပါ နူနာကျိုးကန်းတွေမြင်မှ ဝဋ်ကောင် လို့ထင်နေတယ်။ မိမိတို့လည်း ဝဋ်ကောင် ပါပဲ။ ဝဋ်ကောင်မှ ဝဋ်ကောင်အစစ်။ အခု " ဝိပါကဝဋ် "ထဲရောက်နေတော့ မိမိတို့ ခန္ဓာကြီး ဟာ ၉၆-ပါး ရောဂါဝေဒနာတွေ လာပြန်ရင်လဲ ဒီခန္ဓာကြီးက အကုန်လက်ခံရတယ်။ ဒီ ခန္ဓာကြီးထဲမှာ ဘယ်တော့မှ အနာရောဂါ နဲ့  မကင်းဘူး။ ထမင်းဆာတဲ့...ရောဂါ၊ ရေဆာတဲ့...ရောဂါ၊ ကျင်ကြီး ကျင်ငယ်စွန့်ရတဲ့...ရောဂါ၊ အအေးဒဏ်အပူဒဏ်ခံရတဲ့....ရောဂါ စတဲ့ အနာရောဂါတွေဟာ ခန္ဓာကိုယ်ထဲမှာ တစ်ပုံကြီးရှိနေပါတယ်.. လို့  ဆရာတော်ကြီးက ဟောတော်မူပါတယ်။
ဒီတော့ " ဝိပါကဝဋ် " ထဲရောက်နေတော့ ဘယ်တော့ ကျွတ်မှာတုံးဆိုတော့....ဒီ "အဝိဇ္ဇာ ၊တဏှာ"ဆိုတဲ့ " ကိလေသဝဋ်" ကို ဖြတ်နိုင်တဲ့ " မဂ်ဉာဏ်ဖိုလ်ဉာဏ် " မရနိုင်သေးသရွေ့ ဒီ ဝဋ်က ဘယ်တော့မှ မကျွတ်ပါဘူး။ " ကိလေသဝဋ် " မချုပ်သေးသရွေ့ " ကမ္မဝဋ်"ဆက်ဖြစ်နေမှာပါပဲ။ " ကမ္မဝဋ် "မပြတ်သရွေ့ " ဝိပါကဝဋ်" ကတော့ဆက်ဖြစ်နေမှာပါပဲ။ ဒီတော့ ဓမ္မမိတ်ဆွေတို့မှာ ကံ ရဲ့ စီမံသလိုခံရတော့ ရောဂါမျိုးစုံပေါက်လာပြီး “ကံနာဝဋ်နာ” သင့်နေတာပါပဲ။
ကိလေသာ ရဲ့ စီမံသလိုလဲ ခံနေရတယ်။
" အဝိဇ္ဇာ ၊ တဏှာ " ဆိုတဲ့ ကိလေသာ က ခိုင်းလိုက် စီမံလိုက် ပြန်ရင်လဲ၊ ဒီရုပ်နာမ်ခန္ဓာကြီး ဟာ မသွားမလာ ပဲ နေလို့မရဘူး။ မငြင်းဆန်ရဲဘူး။ "ကိလေသာ" စေခိုင်းရာလုပ်ရတယ်။
လုပ်ရတော့ သူဟာ“ကျွန်ဝဋ်ကောင်”ပါပဲ။ ဒီ "ဝဋ်သုံးပါး " တစ်ပါးပါးက စီမံလိုက်တော့ ခံရတာပါပဲ။ ဒါတော့ "ကျွန်ဝဋ်ကောင်" ပေါ့။ " ဝဋ် "ကျွတ်ကြောင်းတရားက
မရသေးတော့ " ဝဋ် " မကျွတ်သေးဘူးပေါ့။
ဒီတော့ "ကိလေသဝဋ် " မချုပ်သရွေ့၊ "ကမ္မဝဋ် " မချုပ်သရွေ့ ၊ "ဝိပါကဝဋ်(အကျိုးပေးဝဋ်) " တော့ ခံရမှာပဲ။ ဒါဖြင့်
" ကိလေသဝဋ်" ဖြတ်မှပဲ။ ဒါဖြတ်မှ " ကမ္မဝဋ်" ပြတ်ပါလိမ့်မယ်။ "ကမ္မဝဋ်" ပြတ်မှ ဒီ " ဝိပါကဝဋ် " က ကျွတ်မှာပါ။ အခု
" ဝိပါကဝဋ် "ထဲရောက်နေတုန်းမှာ ဒီ "ကိလေသဝဋ် " ပြန်ပေါက်ရင် နောက် ဒီ " ဝိပါက၀ဋ် " ကြီးမျိုး ပြန်ရဦးမှာပဲ။
"အဝိဇ္ဇာ၊ တဏှာ"ဆိုတဲ့ "ကိလေသဝဋ်" တွေ ပေါက်ပွားနေတော့၊ ဒီ "အဝိဇ္ဇာ တဏှာ " ခိုင်းသမျှ လုပ်နေကြရတယ်။
ဥပမာ..
သူများတွေ ကိုကြည့်။ သူများတွေ တိုက်နဲ့ကားနဲ့ နေရတယ်။ မိမိ အဖြစ်တွေက ညံ့သေးတယ် လို့ မိစ္ဆာဉာဏ် အဝိဇ္ဇာ က အသိပေးလိုက်တော့ သူတို့လို ကြီးပွားချင်တဲ့
"တဏှာ"က ကပ်ပါလာပါတယ်။ ဒီ "အဝိဇ္ဇာ၊တဏှာ" က "ကိလေသဝဋ်" ပေါက်ပွားတော့ ကာယကံ ဝစီကံ မနောကံ နဲ့ ကြိုးစားလိုက်ရင် ဒါ "ကမ္မဝဋ် "ဆိုတာ လာပြီပေါ့။ "ကမ္မဝဋ်" ဖြစ်တော့ ဒီမှာ စုတိမနေ၊ သေလွန်ရင် "ဝိပါကဝဋ် "ဆိုတဲ့ ခုလို ရုပ်နာမ်ခန္ဓာကြီး ပေါ်လာပါလိမ့်မယ်။
" ကိလေသဝဋ် " ပေါက်ပွားလို့ "ကမ္မဝဋ် "လုပ်ဖြစ်တယ်။ " ကမ္မဝဋ် "လုပ်ဖြစ်တော့ နောင်ဘဝ ဆိုတဲ့ " ဝိပါကဝဋ် " လာရမှာပဲ။ နောင်ဘဝ " ဝိပါကဝဋ် "လာရင် ဒီအထဲက " ကိလေသဝဋ် " ပေါက်ပွားဦးမှာပါပဲ။ ဒီတော့ .. ဓမ္မမိတ်ဆွေတို့မှာ ထွက်ပေါက်ကိုမရှိပါဘူး။ အဝိုင်းပြေးပဲ ပြေးနေရတယ်။ တသံသရာ လုံး ဒီအဝိုင်းပြေး ပြေးနေရပါတယ်။ အဲဒီလို အဝိုင်းပြေး ပြေးနေတော့ နားခွင့်လမရကြပါဘူး၊ တပြေးထဲ ပြေးနေတာပါပဲ။
ကရွတ် ကင်းလျှောက်သလို၊ တစ်ပတ်ပြီးတစ်ပတ်၊ အပတ်ပေါင်း မရေမတွက်နိုင်အောင် ပြေးနေရတယ်။ ဘယ်တော့ဆုံးမှာလည်း မဟုတ်ပါဘူး။ မဆုံးပါဘူး။ ဒါ တသံသရာလုံး နေခဲ့ရတာ။ ဘုရားတောင် အစ ရှာမတွေ့ဘူး။ ဒီလို ဝိုင်းနေ-လည်နေ (ပတ်ပြေးနေ)တာ လူတစ်ယောက် ရဲ့ အစရှာမတွေ့နိုင်ပါဘူး။ ဝိုင်းနေတာတော့ ကြက်ဥလိုပါပဲ အစရှာမတွေ့ဘူး။ အဲဒီ အဝိုင်းဇာတ် ကို အခုလို အသိတရားရှိတဲ့ အချိန်မှာ သတ်ရင်သတ်၊ မသတ်ရင် နောက် ဒီအဝိုင်း ဇာတ်သိမ်းဖို့ မမြင်တော့ဘူး။ နောက် အခုလို အခွင့်ရေးရဖို့ လည်း လမ်းမမြင်ပါဘူး။
ဒီတော့... ဓမ္မမိတ်ဆွေတို့ ..
" ဝဋ်သုံးပါး "ကို ကိုယ်တိုင်လည်တတ်ပြီ လို ထက်ပါတယ်။ ဝဋ်လည်တယ် ဆိုတာ သဘောပေါက်ပြီလို့ အောက်မေ့ပါတယ်။
ဆရာတော်ကြီးက ဘယ်လို ဟောသလဲ ဆိုတော့...
"ဦးခေါင်းပြောင်းချင်တဲ့ သဘောပေါ့" ....တဲ့။
ဇာတ်တော်ထဲ မှာပါတဲ့ ဥပရိမိဖုရားကြီးဟာ သေတော့ နောက်ချေးပိုး သွားဖြစ်တယ်။ နောက်ချေးပိုး ဘဝ ကနေပြီး ကိုယ့်ဟာကိုယ် စဉ်းစားစမ်း၊ တခါထဲ ကျောက်ခဲရေထဲချလိုက်သလို မြှုပ်သွားတာပဲ။ ပြီးတော့ ရှေးတုံးက..အမေတစ်ယောက်ဟာ သားကလေးခင်ပြီး သေသွားတာနဲ့ တောထဲမှာ ခွေးကြီးသွားဖြစ်တယ်။ လူ့ခေါင်းက ခွေးခေါင်းပြောင်းသွားတယ်။
သားကလေးခင်တဲ့ "ကိလေသဝဋ် " ကြောင့် စိုးရိမ်ကြောင့်ကြတဲ့ " ကမ္မဝဋ် " လုပ်လိုက်တော့ " ကမ္မဝဋ် "ရဲ့တန်ခိုးသတ္တိကြောင့် စုတေစိတ်ကျပြီး ခွေးကြီးသွားဖြစ်ရတယ်။
ဘုရားလက်ထက်က ဦးတိဿကြီးဟာ ဇေတဝန်ကျောင်းမှာ သူ့သင်္ကန်းကိုစွဲတဲ့ " ကိလေသဝဋ်" ကြောင့် သူ့သင်္ကန်းမှာ သန်းကြီး သွားဖြစ်တယ်။ ရဟန်းခေါင်းက သန်းခေါင်း သွားဖြစ်တယ်။ မိမိတို့ ၊ ဓမ္မမိတ်ဆွေတို့ ခေါင်းပေါ်ကသန်းတွေ ဟာဘယ်ကလာတယ်သတုံး.. ဆိုတော့
မိမိတို့ အပေါ်သံယောဇဉ်ဖြစ်ကြတဲ့ ဖိုးအေဖွားအေ၊ အမေအဖေတွေက လာတာပါ။ ဓာတ်သဘာဝ ချည်း တွေ ပဲလို့ ထင်မနေကြပါနဲ့ ...တဲ့။ ဒါကို မသိတော့ သန်းဥတွေကို တုပ်ရတာ နဲ့ သန်း ရှာလွင့်ပစ်ရတာနဲ့၊ အဖိုးအဖွား အမေအဖေကို ဖျက်ဆီးကြတယ်။ မိမိတို့ ၊ ဓမ္မမိတ်ဆွေတို့လည်း ဒီအတိုင်းပါပဲ...တဲ့။
"အဝိဇ္ဇာ နဲ့ တဏှာ" ချုပ်အောင်မလုပ်နိုင်ရင် ဒီလိုခင်တွယ်တဲ့ သားသမီးခေါင်းပေါ်သွားပြီး ပျော်ရဦးမှာပါပဲ။ ဒီတော့ ဝဋ်ကျွတ်အောင်လုပ်ရင်လုပ်။ မလုပ်ရင် ခေါင်းပြောင်းရမှာတော့ သေချာပြီ လို့ ဆုံးမတော်မူပါတယ်။
"သုတ္တနိပါတ်"ထဲမှာ ..
လူတစ်ယောက်ဟာ သူ့မိန်းမကို စွဲလမ်းသေသွားတာနဲ့ သူ့မိန်းမအိမ်မှာ ခွေးသွားဖြစ်တယ်။ သူ့မိန်းမကို ခင်လို့ ခွေးသွားဖြစ်တာ။
ခွေးက သံယောဇဉ်ရှိလို့ သူသွားတိုင်း နောက်ကလိုက်နေတော့ သူ့မှာ ခွေးမုဆိုးမ လို့ အခေါ်ခံရတဲ့အတွက် သူက ခွေးကို တိတ်တဆိတ်သတ်ပစ်လိုက်တယ်။ အဲဒီတော့ သိပ်ပြီးကြွားမနေနဲ့။ ဝဋ်ကျွတ်မှ ကြွားပါ။ အခုကြွားနေတာကတော့ ခဏလေးပဲ။ ခေါင်းမပြောင်းခင်ပါ။ တော်တော်ကြာ ဂျိုကြီးကားယားနဲ့ လာချင်လာမှာ။ အစွယ်ငေါငေါနဲ့ လာချင်လာမှာ။ ဝဋ်မကျွတ်သရွေ့ စိတ်ချ လက်ချနေတဲ့ပုဂ္ဂိုလ် ဟာ လောဘနဲ့ရူး၊ ဒေါသနဲ့ရူး၊ မောဟနဲ့ရူးတဲ့ လူပဲဖြစ်ပါတယ်။ ဒီအရူးသုံးပါး တစ်ပါးပါး နဲ့ ဖြစ်လို့သာ၊ မိမိတို့ မှာ ဝဋ်မကျွတ် ချင်တာပါပဲ။
အကျဉ်းချုပ်ရရင်တော့..
ဓမ္မမိတ်ဆွေတို့ဟာ လောကအနေ နဲ့ လူကြီးလူကောင်းတွေပါပဲ။ ဒါပေမယ့် သစ္စာအနေနဲ့ပြောရရင် "အဝိဇ္ဇာတဏှာ"ချုပ်အောင် မလုပ်သရွေ့ ဥမ္မတ္တက( အရူး) ပဲဖြစ်ပါတယ်။
ခေါင်းပြောင်းတာ သူ့အလုပ်ပါပဲ။ ခေါင်းပြောင်းပြီးခွေးကြီးဖြစ်တော့ ကိုယ့်သားသမီးအရင်းရဲ့ အရိုက်ခံရမှာပဲ။ သူ့အမေ ခွေးဖြစ်မှန်းမသိလို့ ရိုက်တာ။ခွေးဖြစ်အောင်လုပ်တဲ့လူဟာ အရိုက်ခံရ တာနည်းပါသေးတယ်။ သားသမီးတွေ နဲ့ ပါတ်သက်ပြီး ခွေးဖြစ်ရတဲ့ ဝတ္ထုပေါင်း အတော်များပါပြီ။"အရူး"မပြောက်သရွေ့ အဝိုင်းပြေးရုံပါပဲ။ ခေါင်းပြောင်းရုံးပါပဲ။
ဒီတော့ မိမိတို့ ၊ ဓမ္မမိတ်ဆွေတို့ ဟာ အရူး ဗုံတီးမြှောက်တဲ့အလုပ်တွေ မလုပ်ကြတော့ဖို့ လိုပါတယ်။
"ကိုယ့်အရူး" ပျောက်အောင် ကိုယ်လုပ်ကြရမှာဖြစ်ပါတယ်။ အရူးပျောက်ဖို့ရာ "အဝိဇ္ဇာနဲ့တဏှာ"ဆိုတဲ့ “ကိလေသာ အရူး”ကို "မဂ်ဓား" နဲ့ ဖြတ်ကြပေတော့..လို့ ဟောကြားတော်မူခဲ့တဲ့ ..
" ဝဋ်( ၃ )ပါး " ဖြတ်ပုံ တရားတော် ကို တင်ပြရင်း မျှဝေကုသိုလ်ပြုလိုက်ပါတယ်။
•••••••••••••••••••••••••••••••••••••••••••••••••••••••••••••••
တွင်လည်းဖတ်ရှူ နိုင်ပါသည် ။
---------------------------------------------------------------------------
posted from Bloggeroid
No comments:
Post a Comment