ငါးပါးသီလရဲ့အကျိုးတရား၊ ကုသိုလ်ရဲ့အကျိုးတရားနှင့် သရဏအဓိပ္ပာယ်

ငါးပါးသီလကို သာမန်ကြည့်လိုက်ရင် ဒါ သီလလေးပဲ ဆိုပြီးတော့ အထင်သေးကောင်း သေးလိမ့်မယ်။ ဘာဝနာမလုပ်ရင် မရဘူးတို့၊ သမာဓိလုပ်ငန်းဝေးရင် မရဘူးတို့၊ ပြောကောင်း ပြောလိမ့်မယ်။

ကဲ၊ ငါးပါးသီလဟာ မဂ္ဂင်ရှစ်ပါးထဲမှာ ကြည့်လိုက်မယ်ဆိုရင် သမ္မာဝါစာ၊ သမ္မာကမ္မန္တ၊ သမ္မာအာဇီဝပဲ။

အဲဒီ ငါးပါးသီလနဲ့ လုံလုံခြုံခြုံအသက်မွေးရင် သမ္မာအာဇီဝ ဖြစ်တယ်။ သမ္မာအာဇီဝဆိုတာ မဂ္ဂင်ရှစ်ပါးထဲမှာ ပါတဲ့အတွက်ကြောင့် မြတ်စွာဘုရားက မဇ္ဈိမပဋိပဒါပဲ။

မဇ္ဈိမပဋိပဒါကို ဘုရားက ဘယ်လိုဟောတုန်း။
"စက္ခုကရဏီ၊ ဉာဏကရဏီ၊ ဥပသမာယ အဘိညာယ သမ္ဗောဓာယ နိဗ္ဗာနာယ" နိဗ္ဗာန်ရောက်အောင် ပို့ဆောင်နိုင်တဲ့သတ္တိ ရှိတယ်တဲ့။

ငါးပါးသီလလုံအောင် ကျင့်နေခြင်းသည်ပင် မဂ္ဂင်ရှစ်ပါး အကျင့်တရားထဲက သမ္မာဝါစာ၊ သမ္မာကမ္မန္တ၊ သမ္မာအာဇီဝကို ကျင့်ရာမရောက်ပေဘူးလား။ ရောက်တယ်တဲ့။

အဲဒါမပါရင် ကျန်တဲ့ သမ္မာဝါယာမ၊ သမ္မာသတိတို့၊ သမ္မာသမာဓိတို့ဆိုတာ မဖြစ်နိုင်ဘူး။ သူက ပိုပြီးတော့ အခြေခံကျတယ်။

ဒါကြောင့်မို့လို့ မြတ်စွာဘုရားက ဒီ ငါးပါးသီလဟာ ရှောင်ကြဉ်လိုက်တယ်လို့ ဆိုလိုက်တာနဲ့ တစ်ပြိုင်နက် ကုသိုလ်တွေ ကိုယ့်သန္တာန်မှာ စီးဝင်ပြီးတော့ နိဗ္ဗာန်လမ်းကြောင်းပေါ်မှာ ဦးတည်မိတာနဲ့ အတူတူပဲပေါ့။ မဂ္ဂင်ရှစ်ပါး အကျင့်တရားထဲက အဲဒီ သုံးပါး ကျင့်လိုက်မိပြီပေါ့။
သုံးပါးပေါ် ရောက်လာပြီဆိုရင် ကျန်တဲ့ ငါးပါးအပေါ်ရောက်ဖို့ ကိုယ်က ဆက်လုပ်ဖို့ပဲ ကျန်တော့တယ်ပေါ့။ ဒီလို ဆိုလိုတယ်။

အဲဒီတော့
ဣဋ္ဌ- လိုချင်စရာတွေကို ဒီကုသိုလ်က ပေးတယ်။
ကန္တ- နှစ်သက်စရာတွေ၊
မနာပ- မြတ်နိုးစရာတွေ ဒီကုသိုလ်က ပေးမယ်။

မြတ်စွာဘုရားက ငါးပါးသီလကို မဟာဒါနလို့ ဟောပြီးတဲ့အခါမှာ ထိုငါးပါးသီလရဲ့ အကျိုးတရားတွေ၊ ဒီရှောင်ကြဉ်မှုရဲ့ စေတနာ၊ ဒီကုသိုလ်ရဲ့ အကျိုးတရားတွေကို ဒီလိုဟောထားတာ အားရစရာ၊ အလွန်အားရစရာကောင်းတာပေါ့။

ရှေးဆရာတွေက ဟောကြတယ်၊ ဆုံးမစာတွေရေးကြတယ်၊ ငါးပါးသီလကို ခါးဝတ်ပုဆိုးကဲသို့ မြဲရမယ်တဲ့ ဒီလိုပြောတယ်။ အင်မတန်မှ လိုအပ်တဲ့အရာဖြစ်လို့ ဒီလိုဟောတာ။

အခု ဒီသုတ္တန်မှာကျတော့ မြတ်စွာဘုရားက ဒီငါးပါးသီလကို "မဟာဒါန မြတ်သောအလှူ" ကြီးကျယ်မြင့်မြတ်တဲ့ အလှူဒါနကြီးတစ်ခုလို့ ဒီလိုဟောတယ်။

ငါးပါးသီလနဲ့အတူ ဘာကိုထည့်ဟောတုန်းဆိုတော့ မြတ်စွာဘုရားက တကယ့်ကို မပြတ်စီးဝင်နေတဲ့ ကုသိုလ်ဆိုတဲ့အထဲမယ် သရဏဂုံသုံးပါးလည်း ပါတယ်တဲ့။

မြတ်စွာဘုရားကို ကိုးကွယ်ရာလို့ ဆည်းကပ်ပြီဆိုရင် ဆည်းကပ်တယ်ဆိုတဲ့ ကုသိုလ်စေတနာဟာ ကုသိုလ်အားလုံး မိမိသန္တာန်မှာ စီးဝင်လာဖို့ရာအတွက် လမ်းဖွင့်ပေးတာ ဖြစ်သောကြောင့် ကုသိုလ်အလျဉ်ဟာ စီးဝင်လာတယ်လို့ ဒီလိုပြောတာနော်။ ဘုရားကို ကိုးကွယ်တယ်၊ တရားကို ကိုးကွယ်တယ်၊ သံဃာကို ကိုးကွယ်တယ်၊ ဒီကိုးကွယ်မှု သုံးရပ်ဟာလည်းပဲ "ကုသလာဘိသန္ဒ ပညာဘိသန္ဒ" စီးဝင်လာတဲ့ကုသိုလ်တွေ၊ ကိုယ့်သန္တာန်မှာ စီးဝင်လာတဲ့ ကောင်းမှုတွေပဲလို့ မြတ်စွာဘုရားက ဒီလိုဟောတာ။

အဲဒီတော့ သရဏ လို့ ဆိုတဲ့နေရာမှာ ဘာကိုပြောတာလဲ၊ ဘေးရန်အန္တရာယ် အဆိုးတွေကို ဖယ်ရှားပစ်နိုင်တဲ့ စွမ်းအားရှိတဲ့ အရာလို့ ဒီလိုဆိုတယ်။

မြန်မာလိုက ကိုးကွယ်ရာလို့ ဒီလို ပြန်ပေမယ့်လို့
သရဏ ဆိုတဲ့ စကားလုံးအဓိပ္ပာယ်က ဖယ်ရှားပစ်ခြင်း၊

ဘာကို ဖယ်ရှားပစ်တာတုန်း။
ဆင်းရဲဒုက္ခတွေကို ဖယ်ရှားပစ်တာ။

အဲဒီ ဆင်းရဲဒုက္ခတွေကို ဖယ်ရှားပစ်တာ ဘယ်အရာက ဖယ်ရှားပစ်တာတုန်းမေးရင် ဘုရား၊ တရား၊ သံဃာ ရတနာသုံးပါးက ဖယ်ရှားပစ်တယ်။

ဒါဖြင့် ဘယ်လိုပုံစံ ဖယ်ရှားပစ်တာတုန်း။
ကြည့် မြတ်စွာဘုရားက သတ္တဝါတွေကို ကောင်းကျိုးချမ်းသာ ရဖို့အတွက် ကုသိုလ်ကောင်းမှုတွေကို လုပ်ဖို့၊ မကောင်းကျိုးတွေ လွတ်ကင်းဖို့ရာအတွက် အကုသိုလ်တွေကို ရှောင်ဖို့ဆိုတဲ့ ဆုံးမဩဝါဒပေးတယ်။

ဆုံးမဩဝါဒအတိုင်း လိုက်နာမယ်ဆိုရင် ကျရောက်မယ့် ဘေးအန္တရာယ်တွေ မကျရောက်တော့ဘူး။

ဆုံးမဩဝါဒပေးပြီး လမ်းညွှန်ပြခြင်းဖြင့် သတ္တဝါတွေသန္တာန်မှာ ကျရောက်မယ့် ဘေးအန္တရာယ်တွေ ဖယ်ရှားပစ်တယ်လို့ ဒီလိုပြောတာ။

အဂ္ဂမဟာပဏ္ဍိတ အရှင်နန္ဒမာလာဘိဝံသ(Ph. D)

စာအုပ်အမှတ်စဉ်(၂၉)၊ မဟာဒါနတရားဒေသနာတော်မှ ကောက်နုတ်ကူးယူပူဇော်ပါသည်။
-------------------------------------------------------------

https://muditar.blog.com
www.facebook.com/muditaralinnsayadaw/
www.facebook.com/muditaralinnsayadwdham
achannallive/ တွင်လည်းဖတ်ရှူနိုင်ပါသည် ။