လူငယ်များသို့ သြဝါဒ

🌻 ဘယ်အရာဖြစ်ဖြစ်
● ကောင်းတဲ့အရာ, မကောင်းတဲ့အရာ
● လုပ်သင့်တဲ့အရာ, မလုပ်သင့်တဲ့အရာ
ဒီလို နှစ်ခုခွဲပြီးကြည့်ရမယ်။

🍀 လုပ်သင့်တဲ့အရာဆိုတာ ဘာလဲ
● မိမိကိုလည်း ထိခိုက်နစ်နာမှု မဖြစ်စေဘူး။
● သူတစ်ပါးတွေကိုလည်း ထိခိုက်နစ်နာမှု မဖြစ်စေဘူး။
● နှစ်ဦးလုံးကို ထိခိုက်နစ်နာမှု မဖြစ်စေဘူးဆိုတဲ့ အလုပ်ဟာ လုပ်သင့်တဲ့အလုပ်။
ဒါနဲ့ပဲ စံထားရမှာ။

🌸 ကိုယ်လုပ်တဲ့လုပ်ငန်းတစ်ခုဟာ
ကိုယ့်ကို ထိခိုက်သွားရင် မလုပ်သင့်ဘူး။

★ ထိခိုက်တယ် ဆိုတာ
ရရှိမယ့် အကျိုးတွေ လက်လွတ်သွားရင်
ရရှိသင့်တာတွေ မရရှိတော့ဘူးဆိုရင် ထိခိုက်တယ်လို့ ခေါ်တယ်။

🌹 ကိုယ့်လည်း မထိခိုက်ဘူး။
သူတစ်ပါးလည်း မထိခိုက်ဘူး။
နှစ်ဦးစလုံးကို မထိခိုက်ဘူး။
မထိခိုက်တဲ့အပြင် ကောင်းကျိုးချမ်းသာတွေကို ဖြစ်ပွားစေမယ်ဆိုရင် ဒါ လုပ်သင့်တဲ့အလုပ်။ Criterion အနေနဲ့ ဒီလိုမှတ်ရမှာ။ ဒါ "မှတ်ကျောက်" လို့ခေါ်တာပါ။

🌷 ဒါ ဘုန်းဘုန်းအနေနဲ့ ပြောတာ မဟုတ်ပါဘူး။
ဘုန်းဘုန်းတို့ ပိဋကတ်စာပေထဲမှာ "အတ္တဗျာဗာဓာယပိ သံဝတ္တတိ
ပရဗျာဗာဓာယပိ သံဝတ္တတိ
ဥဒယဗာဓာယပိ သံဝတ္တတိ" လို့ Criterionကို မြတ်စွာဘုရားကိုယ်တိုင် ဟောပြထားခဲ့တာ။ ဒါနဲ့တိုင်းတာရမှာ။

🌼 အတိုင်းအတာလေး ၃ ခု
ကိုယ်လုပ်တဲ့အလုပ်တစ်ခုသည်
● ကိုယ့်ကို ထိခိုက်သလား
● သူတစ်ပါးကို ထိခိုက်သလား
● နှစ်ဦးကို ထိခိုက်သလားလို့ စဉ်းစားသင့်တယ်နော်။

🍃 ထိခိုက်တယ်ဆိုတဲ့နေရာမှာ
ဘုန်းဘုန်းဥပမာတစ်ခုပြောပြမယ်။
မူးယစ်ဆေးဝါးသုံးစွဲတယ်။ အရက်သေစာ သောက်စားတယ် ဆိုပါတော့။
တချို့ပုဂ္ဂိုလ်တွေက ပြောတာရှိတယ်။
"ကိုယ်ကြိုက်လို့ ကိုယ်သောက်။ ဗိုက်မှောက်အိပ်နေ။ ဘာမှ မဆူနဲ့။ မညံနဲ့။ အပြစ်မရှိဘူး" လို့ထင်တယ်။ ဒါကတစ်ယောက်။

တချို့က အရက်သောက်ပြီး အရပ်ထဲမှာ ဆဲတယ်။ ရန်ဖြစ်တယ်။ နှောင့်ယှက်တယ်။ ဒါက တစ်ယောက်။

🌱 ကဲ စဉ်းစားကြည့်စမ်း။
အရက်သေစာ သောက်စားမူးယစ်နေတဲ့သူဟာ "ထိုအချိန်အတွင်းမှာ သူရသင့်ရထိုက်တဲ့ အတတ်ပညာ, အသိပညာ, စီးပွားဥစ္စာတွေ မရနိုင်တော့ဘူးနော်"။ ကိုယ့်ထိခိုက်တဲ့ အလုပ်ဆိုတော့ ခုန စံ နဲ့သွားတိုက်လို့ရှိရင် ဒါကောင်းတဲ့အလုပ်လို့ ခေါ်လို့ မရတော့ဘူး။ ကောင်းတဲ့ အလုပ်မဖြစ်ဘူးနော်။

🌿 သူများအတွက် အနှောက်အယှက် မဖြစ်သော်လည်း ကိုယ့်အတွက် အနှောက်အယှက်ဖြစ်သွားပြီ။
ကိုယ့်အတွက် ဆုံးရှုံးသွားပြီ။တတ်ရမယ့် ပညာတွေ မတတ်လိုက်ရဘူး။ အဲ့ဒီအချိန်မှာ အဖိုးတန်ပညာတွေ ကိုယ်မရလိုက်ဘူး။ တန်ဖိုးရှိတဲ့အချိန်အတွင်းမှာ စီးပွားဥစ္စာ မရလိုက်ဘူး။ ကုသိုလ်တွေ မရလိုက်ဘူး။ ဆုံးရှုံးသွားတယ်။ ဒါလည်း ဆုံးရှုံးမှု လို့ ခေါ်တယ်။ ပိုက်ဆံတွေ ငွေကြေးဓနတွေ ဆုံးရှုံးမှ ဆုံးရှုံးတာမဟုတ်ဘူး။

❄ လူ့လောကမှာ ငွေကြေးဓနဟာ တကယ့်အနှစ်သာရ မဟုတ်ဘူး။ တကယ့်အနှစ်သာရဆိုတာကို မြတ်စွာဘုရားက "ပညာ နရာနံ ရတနံ" တဲ့။ လူတွေရဲ့ တကယ့်အနှစ်သာရ ရတနာဟာ အသိပညာ အတတ်ပညာပဲနော်။

🎀 လုပ်သင့်တဲ့အလုပ်ဆိုတာ
✔ မိမိအတွက်လည်း အကျိုးရှိတယ်။
✔ သူတစ်ပါးအတွက်လည်း အကျိုးရှိတယ်။
✔ နှစ်ဦးနှစ်ဝ အားလုံးကို အကျိုးရှိတယ်ဆိုရင် ဒါ ကောင်းတဲ့အလုပ်လို့ သတ်မှတ်တယ်။

ပါမောက္ခချုပ်ဆရာတော်ကြီး၏
"လူငယ်များသို့ သြဝါဒ" စာအုပ်မှ
ထုတ်နုတ်ပူဇော်ပါသည် ၊

https://muditar.blog.com
www.facebook.com/muditaralinnsayadaw/
www.facebook.com/muditaralinnsayadwdham
achannallive/ တွင်လည်းဖတ်ရှူနိုင်ပါသည် ။