သေပြီးတဲ့နောက် ဘာဖြစ်မလဲ၊ ကိုယ်ကိုယ်တိုင် မဆုံးဖြတ်နိုင်ပါ။ မိမိကိုယ်တိုင် မဆုံးဖြတ်နိုင်တဲ့အခါ မြတ်စွာဘုရားက "အကြံဉာဏ်” ဆုံးမသြဝါဒပေးထားပါတယ်။ အဲဒီလို မဆုံးဖြတ်နိုင်တဲ့အခါ သေချာတာကိုလုပ်ပါတဲ့။ ဒီဘဝမှာ ကောင်းအောင်နေခြင်းဖြင့် နောင်ဘဝအရေး စိတ်အေးရမယ့် အချက်လေးချက်ကို မြတ်စွာဘုရား ဟောထားပါတယ်။ တချို့ ဘာသာရေးဆရာက......
(၁) တမလွန်လောက မရှိဘူးလို့ပြောတယ်။
(၂) တချို့ က ရှိတယ်လို့ ဟောတယ်။ အဲဒီလို _ ဆန့်ကျင်ဘက်နှစ်ခုကြားမှာ မြတ်စွာဘုရားဟောကြားထားတာက "ဒီဘဝမှာ ကောင်းအောင်လုပ်၊ မေတ္တာ၊ ကရုဏာ၊ မုဒိတာနဲ့နေ။ အများအတွက် ကိုယ်ကိုယ်တိုင်က လောဘ၊ ဒေါသ၊ မောဟ အခြေခံတဲ့ အကုသိုလ်တွေကို စွန့်ပယ်ပြီး အလောဘ၊ အဒေါသ၊ အမောဟ အခြေခံတဲ့ ကုသိုလ်တရားတွေ ပြီးပြည့်စုံအောင်လုပ်” ပါတဲ့။ အဲဒီလို ဖြူစင်နေတဲ့စိတ်ရှိတဲ့ပုဂ္ဂိုလ်ဟာ တမလွန်လောကမရှိလည်း ဘာမှ ပူစရာမလိုပါ။ ဒီဘဝမှာ ကောင်းမှုကုသိုလ်တွေ ရှိနေရင် တမလွန်လောက ရှိပြီဆိုရင်လည်း ဟိုဘဝမှာ ချမ်းသာတဲ့ဘဝဆီ ရောက်သွားမယ်။ ဒါဆို- စိတ်သက်သာရာ ရသွားပါတယ်။ ဘယ်ဘက်က ကြည့်ကြည့် သူ့အတွက်က လုံလောက်ပါတယ်။ ဒီဘ၀မှာ ကောင်းအောင်နေသည့်အတွက်ကြောင့် တမလွန်ဘဝ ရှိတယ်ဆိုရင်လည်း နောင်ဘဝ ငါကောင်းတဲ့ဘုံ ရောက်မှာပါပဲ၊ တမလွန်မရှိဘူးဆိုရင်လည်း ဘာမှပူစရာ ကိစ္စမရှိပါ။ ဒီဘ၀မှာ ကောင်းမှုကုသိုလ်တွေ လုပ်နေခြင်းဖြင့် ကိုယ့်ကိုယ်ကိုယ် ချမ်းချမ်းသာသာနဲ့ ထိန်းသိမ်းစောင့်ရှောက်သွားနိုင်ပါတယ်။ ဒီလိုနဲ့ - စိတ်သက်သာရာ နှစ်မျိုးရပါတယ်။
(၃) အကုသိုလ်ဆိုတာမရှိဘူး၊ အကုသိုလ်ဆိုတာ လုပ်လို့မရဘူးလို့ ပြောတဲ့ ပုဂ္ဂိုလ်က တစ်ဦး။
(၄) လုပ်လို့ရတယ်လို့ ပြောတဲ့ ပုဂ္ဂိုလ်ကတစ်ဦး၊ ဒီလိုနှစ်မျိုးကွဲနေပါတယ်။
လုပ်လို့မရဘူးဆိုရင် ငါကိုယ်တိုင်ကမှ အကုသိုလ်မလုပ်တာ၊ မလုပ်ရင် အကုသိုလ်အကျိုး ဘယ်ကလာမလဲလို့ သက်သာရာရပါတယ်။ နှစ်ဖက်စလုံး သူ့အတွက် သေချာပေါက်ကြီးပဲ။ မလုပ်ခြင်းကြောင့်လည်း အကုသိုလ် မရဘူး၊ လုပ်မဖြစ်ခြင်းကြောင့်လည်း အကုသိုလ်မဖြစ်ဘူး။ အဲဒီတော့ လေးဘက်လေးတန်က သက်သာရာရပါတယ်။ ဒီလို- သေချာတဲ့ နည်းစနစ်ကို လိုက်နာကျင့်သုံးရမယ်လို့ မြတ်စွာဘုရားက ကာလာမသုတ်မှာ ဟောကြားထားပါတယ်။
မြတ်စွာဘုရားက အကုသိုလ်တွေရှောင်ဖို့၊ ကုသိုလ်တွေဆောင်ဖို့၊ မေတ္တာ၊ ကရုဏာ၊ မုဒိတာ၊ ဥပေက္ခာတရားတွေ ပွားများအားထုတ်ကြဖို့ဆိုတဲ့ ဒီအခြေခံတရားတွေကို ကာလာမအမျိုးတွေကို ဟောကြားသွားပါတယ်။ ကေသမုတ္တနိဂုံးမှာနေတဲ့ ကာလာမလူမျိုးတွေ အင်မတန်မှ သဘောကျပြီး နောက်ဆုံး ဗုဒ္ဓဘာသာအဖြစ်ကို ခံယူကြပါတယ်တဲ့။ ဒါက- ကွယ်လွန်ပြီးတဲ့နောက် စိတ်ပူစရာမလိုတဲ့ နည်းလမ်းဖြစ်ပါတယ်။
ဒါကြောင့်မို့ တရားချစ်ခင်သူတော်စဉ် ပရိသတ်တို့၊ ကာလာမသုတ္တန်အတိုင်း မြတ်စွာဘုရားဟောကြားဆုံးမတဲ့ တရားကို နာယူမှတ်သားပြီး မိမိတို့ဘဝမှာ တကယ်ဆင်ခြင်စဉ်းစားရမှာက အပြစ်ရှိတဲ့အရာလား၊ အပြစ်မရှိတဲ့အရာလား၊ အကုသိုလ်လား၊ ကုသိုလ်လား၊ ပညာရှိတွေ ကဲ့ရဲ့တဲ့အရာလား၊ ချီးမွမ်းတဲ့ အရာလား၊ လက်တွေ့ကျင့်သုံးလို့ရှိရင် ကောင်းကျိုးချမ်းသာကို ပေးတတ်လား၊ ဆင်းရဲဒုက္ခကို ပေးတတ်လားဆိုတာတွေ ဖြစ်ပါတယ်။
ဒီအတိုင်းအတာတွေနဲ့ ဆင်ခြင်သုံးသပ်ပြီး ကိုယ်ပိုင်ဉာဏ်ဖြင့် ဆုံးဖြတ်ကာ လက်တွေ့လိုက်နာကျင့်သုံးရမှာ ဖြစ်တယ်လို့ ကိုယ်စီကိုယ်စီ သဘောကျပြီး ကျင့်ကြံကြိုးကုတ် အားထုတ်နိုင်ကြပါစေသတည်း။
ပါမောက္ခချုပ်ဆရာတော် ဒေါက်တာနန္ဒမာလာဘိဝံသ
(ကာလာမသုတ်အနှစ်ချုပ်တရားတော်မှကောက်နှုတ်ပူဇော်ပါသည်)
https://muditar.blog.com
www.facebook.com/muditaralinnsayadaw/
www.facebook.com/muditaralinnsayadwdham
achannallive/ တွင်လည်းဖတ်ရှူနိုင်ပါသည် ။
No comments:
Post a Comment