ကုသိုလ်ပြုတိုင်း မဂ်ဖိုလ်နိဗ္ဗာန်ဆုတောင်းယူပါ

ကုသိုလ်ပြုလုပ်တိုင်း မဂ်ဖိုလ်နိဗ္ဗာန်ဆုတောင်းတဲ့အတွက် အကျိုးရပုံသာဓကကလေးကို ပြောပြချင်ပါတယ် ၊

သာဝတ္ထိပြည်မှာ ဝင်္ဂန္တနဲ့ မဟာသေန အမည်ရှိတဲ့ ချစ်ခင်ရင်းနှီးကြတဲ့ ပုဏ္ဍားမိတ်ဆွေ နှစ်ယောက်ရှိတယ် ။

ဝင်္ဂန္တပုဏ္ဍားရဲ့သားဖြစ်တဲ့ အရှင်သာရိပုတ္တရာကို မဟာသေန ပုဏ္ဍားကြီးက အလွန်ချစ်ခင်ကြည်ညိုတယ် ၊

မဟာသေနပုဏ္ဍားကြီး အသက်အရွယ် ကြီးရင့်တဲ့အခါကျတော့ မစားနိုင်၊ မသောက်နိုင်ဘဝရောက်အောင် ဆင်းရဲသွားရှာတယ် ၊

ဒါန မရှိလို့ ဆင်းရဲတယ် ဆိုတာကို အရှင်သာရိပုတ္တရာ မြင်တော်မူတော့ . . . မဟာသေန သူဌေးကြီးအိမ်ရှေ့ နေ့စဉ် ဆွမ်းရပ်တယ် ၊

မဟာသေနပုဏ္ဍားကြီးဟာ အတွေ့မခံဘူးတဲ့ ။ သူ့မှာ လှူချင်တဲ့ သဒ္ဓါ ရှိပေမယ့် လှူရမယ့် အသပြာလှူဘွယ်ဝတ္ထုက မရှိဘဲကိုး ။

အရှင်သာရိပုတ္တရာ အိမ်ပေါက်ဝက လှည့်ကြွသွားတာ မြင်တော့ ပုဏ္ဍားကြီးဟာ စိတ်မကောင်းလွန်းလို့ မျက်ရည်တောင် ကျရှာတယ် ။
---------------------------------------------------

တစ်နေ့တော့ ပုဏ္ဍားဟာ စာဟောပွဲတစ်ခုက ပိတ်ကြမ်း တစ်ပိုင်းနဲ့ နို့ဃနာတစ်ခွက် ရလာတယ် ၊ ပုဏ္ဍားကြီး ဝမ်းသာလိုက်တာ ၊ အရှင်သာရိပုတ္တရာလည်း ကြွလာရော ရသမျှ အကုန်လှူလိုက်တာပေါ့ ၊

ဘာဆုတောင်းသလဲ ဆိုတော့ . . .
" အရှင်ဘုရားတို့ သိမြင်အပ်တဲ့ မဂ်ဖိုလ်နိဗ္ဗာန် တရားထူး တရားမြတ်ကို သိရပါလို၏ " လို့ ဆုတောင်းတယ် ။

အဲဒီဘဝက သေလွန်တော့ အရှင်သာရိပုတ္တရာရဲ့ ဆွမ်းအလှူရှင် သူဌေးအိမ်မှာ ပဋိသန္ဓေယူတယ် ။

သူတော်ကောင်းတွေ သူန္ဓေယူရင် မိခင်မှာလည်း သူတော်ကောင်းစိတ် ပေါက်လာတာ ဓမ္မတာပဲ ၊

ဒီကလေး ပဋိသန္ဓေ ရှိတာနဲ့ သူ့မိခင်ဟာ
အရှင်သာရိပုတ္တရာနဲ့ ရဟန်းငါးရာကို ရေမရောတဲ့ နို့ဃနာဆွမ်း ကျွေးပြီး ၊ သူမကတော့ ဖန်ရည်ဆိုးတဲ့ အဝတ် ဝတ်ပြီး သံဃာတွေရဲ့ အကြွင်းအကျန်ကို စားချင်တဲ့ အာသာချဉ်ခြင်း ဖြစ်တာပါပဲ ။

ယောက်ျားလေးအဖြစ် မွေးလာတော့ တိဿ အမည် မှည့်တယ်၊ အရှင်သာရိပုတ္တရာနဲ့ သံဃာငါးရာကို ပင့်ပြီး လှူဒါန်းကြတဲ့အခါ အရှင်သာရိပုတ္တရာကို မြင်တာနဲ့ မွေးစကလေးဟာ အရင်ဘဝကို ပြန်မှတ်မိသတဲ့ ၊
-----------------------------------------------------

ငါအခုလို သူဌေးသားဘဝ ရောက်လာတာ ဒီမထေရ်ကို ပိတ်ကြမ်းနဲ့ နို့ဃနာ လှူခဲ့တဲ့အတွက်ကြောင့်ပဲ ၊ ငါ့အပေါ် ကျေးဇူးကြီးမားလို့ တတ်နိုင်သမျှ ကျေးဇူးဆပ်မယ် ဆိုပြီး စိတ်အကြံ ဖြစ်နေတယ် ၊

ဒီအချိန်မှာ ကလေးကို ခင်းသိပ်ထားတဲ့ ကမ္ဗလာအခင်းဟာ အသပြာတစ်သိန်း ထိုက်တန်တယ် ၊

ကလေးကို အရှင်သာရိပုတ္တရာ ပြရအောင် မချီလိုက်တယ် ဆိုရင်ပဲ ကလေးဟာ ကမ္ဗလာအခင်းကို လက်သန်းနဲ့ ညှပ်ယူတဲ့အတွက် ကမ္ဗလာ ပါလာတာပေါ့ ၊

သူက အရှင်သာရိပုတ္တရာကို တစ်သိန်းတန်ကမ္ဗလာကို လှူချင်နေတာ ၊ လူကြီးတွေက မသိတော့ သူ့လက်နဲ့ ငြိနေတယ် မှတ်ပြီး ဖယ်ချတော့ တအားငိုတယ် ၊

အဲဒီတော့မှ သူ့အကြံကို ရိတ်မိသွားပြီး တစ်သိန်းတန်ကမ္ဗလာကို လှူလိုက်ကြတယ် ၊
------------------------------------------------------

သူ ( ၇ ) နှစ်သားအရွယ်ရှိတော့ ကိုရင်ဝတ်ဖြစ်တယ် ။

ဒါ . .အကြောင်းမဲ့ မဟုတ်ဘူးနော် ၊
သူ ဒါနပြုစဉ်အခါတုန်းက မဂ်ဖိုလ်နိဗ္ဗာန်ကို ရရပါလို၏ ဆိုတဲ့ " ဆုတောင်းလေး " က ဘဝဆိုတဲ့ လှေဦးကို နိဗ္ဗာန် ဆိပ်ကမ်း ရောက်အောင် လမ်းကြောင်း " တည့် " ပေးလိုက်တာပဲ ။

ကိုရင်ဝတ်တဲ့ (၂ ) ရက်အတွင်း ဆွမ်းခံကြွရာမှာ ဆွမ်းအုပ်တစ်ထောင်နဲ့ ပုဆိုးတစ်ထောင် ရတာကို သံဃာတွေကို အကုန်ပြန်လှူတယ် ။ ခြုံစရာ ကမ္ဗလာထည် မရှိလို့ မီးလှုံနေတဲ့ ရဟန်းတွေကို ဂရုဏာသက်ပြီး ရှေ့ကဦးဆောင် ကြွတော့ ကမ္ဗလာခြုံထည် တစ်ထောင် ရပြန်တယ် ။

မဟာသေနပုဏ္ဏားဘဝတုန်းက . . .
လှူခဲ့တဲ့ ဆွမ်းတစ်ခွက်က . . .
ခု ဒါနက ပြန်ပေးတော့ နေ့စဉ် ဆွမ်းအုပ်တစ်ထောင် ။
လှူခဲ့တဲ့ ပိတ်ကြမ်းတစ်ထည်က . .
ခု ဒါနက ပြန်ပေးတော့ ပုဆိုးတစ်ထောင် ။

ဒါကြောင့် ဒါနဆိုတာ စွန့်တော့ နည်းနည်းလေး ၊
ပြန်ရတော့ အများကြီးပါ ။ ဒါကြောင့် ဗုဒ္ဓက ဓမ္မပဒမှာ

"အနည်းငယ်ကို စွန့်လှူရုံမျှဖြင့် များများကောင်းကျိုး ပြန်ရမည်ကို သိသောပညာရှိသည် အနည်းငယ်သော လှူဖွယ်ဝတ္ထုကို စွန့်လှူဖို့ ဝန်မလေးအပ် " လို့ ဟောကြားတော်မူခဲ့တာပါ ။

ဒါ ဒီဖြစ်ရပ်က ပေးတဲ့ ပထမသင်ခန်းစာပါ ။
---------------------------------------------------

ဒုတိယသင်ခန်းစာက ဒါနပြုတဲ့နေရာမှာ . . .
လှူဖွယ်ဝတ္ထု နည်းတာ၊ များတာ ၊ ကောင်းတာ ၊ ညံ့တာ အဓိက မဟုတ် ။

စေတနာ ဖြူစင်သန့်ရှင်းပြီး ထက်သန်ကောင်းမွန်နေရင် အကျိုးပေး အားကောင်တယ် ဆိုတာပါပဲ ။

မဂ်ဖိုလ်နိဗ္ဗာန်ကို ဆုတောင်းပြီး လုပ်တဲ့ ကုသိုလ် မှန်သမျှကို " ပဲ့ကောင်းတဲ့ ကုသိုလ် " လို့ ဆိုသင့်ပါတယ် ။

တိဿကိုရင်လေးဟာ အတိတ်က ပဲ့ကောင်းတဲ့ ဒါနကုသိုလ်ကို ပြုခဲ့တော့ . . .
ကိုရင်ဝတ်ပြီး ရက်ပိုင်းအတွင်းမှာပဲ ကမဋ္ဌာန်းနည်း ကောင်းကောင်းယူပြီး သာဝတ္ထိနဲ့ ယူဇနာ (၁၂၀ ) ဝေးတဲ့ တောကြီးထဲမှာ တရားအားထုတ်လိုက်တာ သုံးလနဲ့ ရဟန္တာ ဖြစ်တော်မူတယ်။
----------------------------------------------------

ဒီလောက်ဆိုရင် ပုထုဇဉ်တွေ ကုသိုလ်ပြုတိုင်း မဂ်ဖိုလ် ဆုတောင်းတဲ့အတွက် အကျိုးရပုံ လက်တွေ့သာဓက ရှင်းလောက်ပြီ ထင်ပါတယ် . . .။

"မေတ္တာရှင်-ရွှေပြည်သာ"
( လူငယ်များအတွက် ဂမ္ဘီရဝိပဿနာ ၊ စာ-၁၃၄-၁၃၉)

https://muditar.blog.com
www.facebook.com/muditaralinnsayadaw/
www.facebook.com/muditaralinnsayadwdham
achannallive/ တွင်လည်းဖတ်ရှူနိုင်ပါသည် ။